Mnamo Agosti mwaka jana, wakili na mwanaharakati wa haki za kijamii kutoka Uganda, Yvonne Mpambara (34), alichukua hatua ya kihistoria kwa kujaza fomu za uteuzi akilenga kuwania urais wa nchi hiyo. Mpambara aliingia katika kinyang’anyiro hicho akiwa na ajenda iliyojaa matumaini mapya, ikijikita katika uongozi jumuishi, uboreshaji wa huduma za umma, pamoja na mageuzi ya mfumo wa kisheria nchini Uganda.
Hata hivyo, ndoto hiyo iligonga mwamba tarehe 24 Septemba 2025, baada ya Mpambara kupokea taarifa rasmi kuwa hakuwa miongoni mwa wagombea waliothibitishwa na Tume ya Uchaguzi ya Uganda kushiriki katika uchaguzi wa urais.
Hatua hiyo ilizua mjadala mpana, huku Mpambara akiikosoa vikali Tume ya Uchaguzi, akidai imekuwa na mifumo inayowanyima nafasi wanawake wenye sifa stahiki katika mchakato wa uteuzi wa wagombea wa nafasi za juu za uongozi.
“Ninailaumu mifumo iliyopo,” alisema Mpambara kwa msisitizo.
“Kulikuwa na wanawake watatu wenye uwezo na sifa zote za kuwania urais na kufika katika orodha ya mwisho ya wagombea, lakini mfumo uliwakwamisha wote.”
Aidha, Mpambara alieleza wasiwasi wake kuhusu kile alichokiita ukosefu wa uwazi, haki na taratibu zinazoeleweka katika mchakato wa uhakiki wa wagombea unaofanywa na Tume ya Uchaguzi.
Kauli yake imeibua mjadala mpana nchini Uganda na katika ukanda wa Afrika Mashariki kuhusu nafasi ya mwanamke katika siasa, uwazi wa taasisi za uchaguzi, pamoja na umuhimu wa kufanya mageuzi yatakayohakikisha usawa na haki kwa wote wanaotamani kushiriki katika uongozi wa juu wa nchi.
Instagram
Facebook
Hakuna maoni:
Chapisha Maoni