YOON SUK YEOL APATIKANA NA HATIA YA MATUMIZI MABAYA YA MADARAKA

 

Rais aliyeondolewa madarakani wa Korea Kusini, Yoon Suk Yeol, amepatikana na hatia ya kutumia vibaya madaraka na kughushi nyaraka kuhusiana na jaribio lake lililoshindikana la kutangaza sheria ya kijeshi mwaka 2024.

Mahakama ya Seoul inaendelea kujadili iwapo Yoon pia alizuia utekelezaji wa haki kwa kukwepa kukamatwa. Waendesha mashtaka wameiomba mahakama imhukumu kifungo cha miaka 10 jela kutokana na tuhuma hizo.

Hukumu hiyo ni ya kwanza kati ya hukumu nne zinazotarajiwa kutolewa katika kesi mbalimbali zinazohusishwa na uamuzi wake wa kushangaza wa kutangaza sheria ya kijeshi. Ingawa hatua hiyo ilidumu kwa muda mfupi, iliingiza taifa hilo katika msukosuko mkubwa, na kusababisha maandamano ya wananchi huku wabunge wakikimbilia bungeni kupinga na kubatilisha uamuzi huo.

Uamuzi uliotolewa Ijumaa unaonekana kutoa mwelekeo wa namna kesi nyingine zinazomkabili Yoon zinavyoweza kuamuliwa. Mashtaka dhidi yake yanahusisha matumizi mabaya ya madaraka, kughushi nyaraka, pamoja na ukiukwaji wa sheria za kampeni za uchaguzi.