Waziri wa Maliasili na Utalii, Mhe. Dkt. Ashatu Kijaji, amesema kuwa malengo makuu ya Serikali chini ya uongozi wa Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, ni kuhakikisha watanzania wanapata manufaa makubwa zaidi kutokana na rasilimali za nchi. Kwa mujibu wake, Wizara ya Maliasili na Utalii itaendelea kushirikiana kwa karibu na wadau wa sekta hii ili kusimamia urithi wa maliasili na kukuza utalii, hatua ambayo italeta maendeleo kwa wananchi na uchumi wa taifa kwa ujumla.
Dkt. Kijaji ameyasema hayo jijini Dodoma wakati akizungumza na wadau wa uwindaji wenyeji na wamiliki wa buchaa za nyamapori, kwenye kikao kilicholenga kuunda uelewa wa pamoja wa changamoto na fursa zinazojitokeza katika sekta hiyo muhimu. Amesema kuwa Serikali iko “bega kwa bega” na wadau wa sekta binafsi, na kwamba hakuna mtumishi atakayekuwa na nafasi ya kuwamaliza wale wanaoshirikiana na Wizara katika kuendeleza miradi ya kimaendeleo ya sekta ya Maliasili na Utalii.
Aidha, Dkt. Kijaji amewapongeza wadau hao kwa uzalendo wao na kuwataka kuendelea kushikamana na Wizara, ambayo kwa miaka mingi imekuwa na mchango mkubwa katika kukuza uchumi wa taifa na wananchi binafsi. Hatua hii itafungua fursa zaidi za uwekezaji na ajira, hasa kwa vijana, na hivyo kuongeza tija na manufaa ya rasilimali za taifa.
Akizungumza kwa niaba ya Katibu Mkuu wa Wizara, Naibu Katibu Mkuu anayeshughulikia utalii, Bw. Nkoba Mabula, amewahakikishia wadau hao kuwa ofisi yake itahakikisha utekelezaji wa maelekezo yote yaliyotolewa na Waziri Dkt. Kijaji, yanayolenga kufanikisha malengo makuu ya Serikali katika sekta ya Maliasili na Utalii.
Kwa kuzingatia juhudi hizi za Serikali, sekta ya Maliasili na Utalii inatarajiwa kuendelea kuwa mkombozi wa uchumi, ikileta maendeleo ya kiuchumi kwa wananchi, kuhamasisha uwekezaji, na kutoa ajira za kudumu hasa kwa vijana wa Kitanzania.
Instagram
Facebook
Hakuna maoni:
Chapisha Maoni