Bado haijafahamika chanzo halisi cha kuanguka kwa ndege ya kijeshi ya KC-135 inayotumika kujaza mafuta angani, ingawa uwezekano mmoja unaotajwa ni mgongano wa ndege angani wakati wa operesheni.
Ndege za aina hii zina jukumu muhimu katika operesheni za kijeshi, kwani huhakikisha ndege za kivita na mabomu zinapata mafuta ya kutosha wakati wa misheni, hasa pale zinapolazimika kusafiri umbali mrefu kufikia maeneo ya malengo yao.
Operesheni za kujaza mafuta angani huwa kubwa na tata, zikihusisha ndege nyingi kuwa angani kwa wakati mmoja, huku kila moja ikihitaji mafuta ili kuendelea na majukumu yake. Katika mchakato huo, ndege inayopokea mafuta hulazimika kusogea karibu sana na ndege ya mafuta kabla ya kifaa maalum cha kusambaza mafuta kupanuliwa na kushushwa.
Rubani wa ndege inayopokea mafuta hulazimika kuisogelea kwa ustadi mkubwa ndege ya mafuta na kujiweka katika nafasi sahihi kwa kutumia mfumo wa taa uliopo chini ya ndege hiyo, ili kifaa cha kusambaza mafuta kiweze kuunganishwa na ndege yake.
Mawasiliano katika operesheni hiyo hufanywa na mhusika mmoja tu, huku uhamishaji wa mafuta ukiweza kuchukua dakika kadhaa. Katika muda huo wote, ndege inayopokea mafuta huwa karibu sana na ndege ya mafuta – umbali wa takribani futi moja – hali inayohitaji umakini na ujuzi mkubwa wa urubani, hasa kwa kuwa mara nyingi operesheni hizo hufanyika usiku.
Katika baadhi ya misheni, taa za ndege huzimwa kabisa ili kuepuka kugunduliwa na adui, jambo linaloongeza ugumu wa operesheni hiyo.
Jeshi la Anga la Marekani limesema tukio hilo lilitokea nchini Iraq, ingawa bado haijafahamika lilitokea umbali gani kutoka mpaka wa nchi jirani ya Iran.
Instagram
Facebook
Hakuna maoni:
Chapisha Maoni