DRAKE ARIPOTIWA KUKATAA TENA KUSHIRIKI TUZO ZA GRAMMY

Rapa nyota wa kimataifa Drake ameripotiwa kukataa kushiriki katika mchakato wa tuzo za Grammy kwa mara nyingine tena, licha ya kupewa nafasi ya kuwasilisha kazi zake kwa ajili ya kuwania tuzo hizo maarufu duniani.

Kwa mujibu wa ripoti mbalimbali, ikiwemo kutoka  Hot 97, inaelezwa kuwa taasisi ya The Recording Academy iliwasiliana na Drake pamoja na kampuni yake ya muziki Universal Music Group (UMG), ikitaka albamu zake tatu ziwasilishwe rasmi kwa ajili ya kuwania tuzo za Grammy za mwaka huu.

Hata hivyo, taarifa hizo zinaeleza kuwa Drake hajaonesha nia ya kushiriki katika tuzo hizo, jambo ambalo limeendelea kuzua mjadala mkubwa ndani ya tasnia ya muziki duniani. Mashabiki na wachambuzi wengi wamekuwa wakifuatilia kwa karibu msimamo wa msanii huyo ambaye kwa miaka ya hivi karibuni ameonekana kuwa na ukosoaji mkali dhidi ya mfumo wa utoaji wa tuzo za Grammy.

Drake amewahi kueleza mara kadhaa kutoridhishwa na namna tuzo hizo zinavyotolewa, akidai kuwa wakati mwingine hazioneshi mafanikio halisi ya wasanii wala mchango wao mkubwa kwenye tasnia ya muziki wa kimataifa. Kauli na maamuzi yake yamekuwa yakigusa mjadala mpana kuhusu uwazi, usawa na vigezo vinavyotumika kuwachagua washindi wa Grammy.

Hatua hiyo imeendelea kuibua maswali kuhusu uhusiano kati ya wasanii wakubwa duniani na tuzo za Grammy, huku baadhi ya wadau wa muziki wakiamini kuwa msimamo wa Drake unaweza kuwa na athari kubwa katika taswira ya tuzo hizo kwa mashabiki wa muziki duniani kote.