FIFA YAFANYA MABADILIKO MUHIMU KWENYE MFUMO WA KUAMUA NAFASI ZA TIMU KOMBE LA DUNIA 2026

Shirikisho la Soka Duniani (FIFA) limefanya mabadiliko madogo lakini yenye athari kubwa katika mfumo wa kupanga nafasi za timu kwenye hatua ya makundi ya Kombe la Dunia 2026, hatua inayotarajiwa kuathiri ushindani wa mechi za mwisho za makundi.

Kwa mujibu wa mfumo mpya, FIFA itatumia matokeo ya moja kwa moja kati ya timu zinazolingana kwa idadi ya pointi kama kigezo cha kwanza cha kutenganisha nafasi zao, badala ya kutegemea tofauti ya mabao kama ilivyokuwa kwa miaka mingi iliyopita. Hii ni mara ya kwanza kwa mfumo huo kutumika katika historia ya mashindano ya Kombe la Dunia.

Mabadiliko hayo tayari yameanza kuonekana kwenye michuano, ambapo baadhi ya timu zimeathirika kutokana na kanuni hiyo mpya. Haiti na Uturuki zimejikuta zikiaga mashindano mapema licha ya kuwa karibu kwa pointi na timu zilizofuzu, huku wenyeji wenza Mexico na Marekani wakihakikisha nafasi za juu kwenye makundi yao kabla ya kucheza mechi zao za mwisho.

Kihistoria, FIFA iliwahi kutumia mfumo wa uwiano wa mabao kabla ya mwaka 1966, ambapo nafasi za timu zilihesabiwa kwa kuangalia mabao yaliyofungwa dhidi ya yaliyofungwa. Kuanzia mwaka 1970, mfumo wa tofauti ya mabao ulianza kutumika na kuendelea kwa miongo kadhaa hadi kufanyika kwa mabadiliko haya mapya.

Hatua hiyo pia inaifanya FIFA kufuata mfumo unaotumiwa na Shirikisho la Soka Ulaya (UEFA), ambalo kwa muda mrefu limekuwa likitoa kipaumbele kwa matokeo ya moja kwa moja kati ya timu zinazolingana kwa pointi. 

Wanaounga mkono mfumo huo wanaamini kuwa ni wa haki zaidi kwa sababu unazingatia ushindani wa moja kwa moja kati ya timu husika, huku wengine wakiona tofauti ya mabao kuwa kipimo bora zaidi kwa kuwa huakisi kiwango cha timu katika mechi zote za kundi.