BASATA IMEAHIRISHA RASMI TUZO ZA MUZIKI TANZANIA (TMA) 2025

Baraza la Sanaa la Taifa (BASATA) limetangaza rasmi kuahirishwa kwa hafla ya Tuzo za Muziki Tanzania (TMA) 2025, ambayo awali ilikuwa imepangwa kufanyika tarehe 13 Desemba 2025.

TMA 2025 YAAHIRISHWA

Kupitia taarifa iliyotolewa kwenye mitandao yake ya kijamii, BASATA imeeleza kuwa uamuzi wa kuahirisha hafla hiyo umefanyika kwa sababu ambazo hazikuwekwa wazi, huku ikisisitiza kuwa tarehe mpya ya tukio hilo itatangazwa baadaye.

BASATA WAOMBA RADHI

Katika taarifa hiyo, BASATA imewaomba radhi wasanii, wadau wa tasnia ya muziki pamoja na mashabiki wote kwa usumbufu wowote uliotokana na mabadiliko hayo.

“Tunaomba radhi kwa usumbufu wowote uliotokea. Tunawaarifu kuwa hafla ya TMA iliyokuwa imepangwa kufanyika tarehe 13/12/2025 imeahirishwa mpaka pale tarehe nyingine itakapotangazwa,” imeeleza sehemu ya taarifa ya BASATA.

MJADALA WAIBUKA MTANDAONI

Uamuzi huo umeibua mjadala mpana miongoni mwa wasanii na mashabiki wa muziki nchini, wengi wakionyesha maoni tofauti kuhusu kuahirishwa kwa tuzo hizo ambazo ni muhimu katika kutambua na kuthamini mchango wa wasanii wa muziki Tanzania.

Mashabiki na wadau wanashauriwa kuendelea kufuatilia taarifa rasmi kutoka BASATA kwa ajili ya matangazo zaidi kuhusu tarehe mpya ya kufanyika kwa TMA 2025.