Wanaume wawili waliopoteza maisha katika ajali ya barabarani iliyomhusisha bondia maarufu raia wa Uingereza, Anthony Joshua, huko Lagos, Nigeria, hatimaye wametambuliwa.
Kwa mujibu wa kampuni ya kuandaa michezo ya Joshua, Matchroom Boxing, marehemu hao ni Sina Ghami na Latif Ayodele, ambao walikuwa marafiki wa karibu na pia wanachama muhimu wa timu ya Joshua.
Taarifa ya Matchroom Boxing imeeleza kuwa marehemu wote wawili walifanya kazi kwa karibu na Anthony Joshua kwa kipindi kirefu, huku wakijenga uhusiano wa kirafiki na kikazi uliodumu kwa miaka mingi.
Sina Ghami alikuwa kocha wa viungo wa Anthony Joshua kwa zaidi ya miaka 10. Mbali na hilo, Ghami alikuwa mmiliki wa ukumbi wa mazoezi wa Evolve Gym uliopo jijini London. Kwa mujibu wa taarifa za kitaalamu, Ghami alikuwa mtaalamu wa michezo na mazoezi ya viungo, hasa katika eneo la kuimarisha misuli.
Marehemu mwingine, Latif “Latz” Ayodele, alikuwa mkufunzi binafsi wa Joshua. Mapenzi yake makubwa kwa mazoezi ya viungo yalionekana wazi kupitia machapisho yake kwenye mitandao ya kijamii, ambapo alikuwa akihamasisha maisha yenye afya na nidhamu ya mazoezi.
Matchroom Boxing pia imethibitisha kuwa Anthony Joshua alipelekwa hospitalini kwa ajili ya uchunguzi na matibabu, na kwa sasa yuko katika hali imara huku akiendelea kufanyiwa uangalizi wa kitabibu.
Kwa upande wao, maafisa wa usalama nchini Nigeria wamesema ajali hiyo ilitokea baada ya gari walilokuwa wakisafiria kugonga lori, wakidai kuwa mwendo wa kasi ulikuwa miongoni mwa sababu zinazochunguzwa.
Ikumbukwe kuwa Anthony Joshua ni bingwa wa dunia mara mbili wa uzito wa juu, na familia yake ina asili ya Sagamu, mji uliopo katika Jimbo la Ogun, Nigeria. Tukio hili limeacha huzuni kubwa miongoni mwa mashabiki wa ndondi na jamii ya michezo kwa ujumla.
Instagram
Facebook
Hakuna maoni:
Chapisha Maoni