MEZA YA MAGAZETI LEO DESEMBA 01.2025

 

Leo tumekusogezea muhtasari mpana wa kile kilichoibuka kwenye kurasa za mbele za magazeti makubwa nchini. Masuala ya siasa, uchumi, utawala bora na michezo kwa mara nyingine yamechukua nafasi kubwa, huku mjadala juu ya amani na mwelekeo wa nchi baada ya matukio ya hivi karibuni ukiendelea kutawala.

HABARILEO: Kauli ya Mwigulu Yazidi Kuvuma, Bilioni 54 Kwa Kupunguza Foleni Dar na Pwani

Gazeti la Serikali HabariLEO leo limeendeleza mjadala kuhusu Askofu Gwajima, likiandika kwa ukubwa:

“Mwigulu: Gwajima asitafutwe.”

Kauli hiyo imeelezwa ikitoa wito wa kulinda amani na kuacha kuchochea vurugu, hasa baada ya matukio ya uvunjifu wa amani yaliyoshuhudiwa katika baadhi ya maeneo nchini. Aidha, Waziri Mkuu ameripotiwa kumfukuza kazi mtumishi aliyeguswa na tuhuma za kubaka mgonjwa, hatua inayolenga kurejesha nidhamu katika utumishi wa umma.

Habari nyingine kubwa ni kuhusu mpango wa Serikali kuwekeza Shilingi bilioni 54 kupunguza foleni katika maeneo ya Dar es Salaam na Pwani. Mradi wa ujenzi wa madaraja saba umetajwa kuwa wa dharura, ukilenga kupunguza muda wa safari na gharama za uzalishaji.

Katika siasa, kuna ushindani mkali wa kupata nafasi za umeya ndani ya CCM, huku kura zikitarajiwa kupigwa leo.

MWANASPOTI: Mkutano Simba Watikisa, Yanga Yapewa Shavu na Pedro

Gazeti la michezo Mwanaspoti leo limesheheni habari nzito kuhusu mkutano mkuu wa wanachama wa Simba, unaoelezwa kutumia muda usio wa kawaida na kuwasha mijadala mikali.

“Mkutano Simba Dah!” ndilo vichwa lililopewa uzito, likionyesha jinsi wanachama walivyogeuka wakali wakati wakijadili bajeti ya zaidi ya Shilingi bilioni 29 pamoja na mwenendo wa timu kwenye michuano ya CAF Champions League.

Timu hiyo, ambayo kwa sasa inashikilia nafasi ya nne kwenye kundi lao, imetajwa kuendelea kupoteza uwezo uwanjani huku mashabiki wakitaka mabadiliko ya haraka.

Katika upande wa Yanga, kocha Pedro ametajwa akisema “Haikuwa rahisi” huku akiwataka mashabiki kuendelea kuwaunga mkono baada ya mfululizo wa matokeo mazuri.

Habari nyingine zilizopamba ukurasa wa mbele ni pamoja na mtoto wa staa wa muziki P. Diddy kutajwa kwenye habari za burudani, pamoja na Manchester United kuendelea kuonesha maboresho kwenye Ligi Kuu ya England.