Uongozi wa Klabu ya Simba umetangaza rasmi kusitisha mkataba na Meneja Mkuu Dimitar Pantev pamoja na wasaidizi wake wawili, baada ya kufikiwa kwa makubaliano ya pande zote mbili. Hatua hii imekuja ikiwa ni sehemu ya utaratibu wa klabu kujipanga upya katika benchi la ufundi.
Katika taarifa iliyotolewa na Bodi ya Wakurugenzi ya Simba SC, imeelezwa kuwa klabu inathamini mchango wa Pantev, lakini imeona umuhimu wa kufanya mabadiliko ili kuimarisha mwenendo wa timu hasa katika michezo ya ligi na michuano ya kimataifa.
Kwa sasa, majukumu ya kukinoa kikosi cha Simba yatashikiliwa na Kocha Selemani Matola, ambaye amekuwa sehemu ya benchi la ufundi kwa muda mrefu na anafahamu kikosi, wachezaji na mfumo wa klabu. Matola atasimamia timu katika kipindi hiki cha mpito wakati juhudi za kumpata kocha mpya kutoka ndani au nje ya nchi zikiendelea.
Dimitar Pantev alijiunga na Simba akileta uzoefu kutoka soka la Ulaya Mashariki, huku akitarajiwa kuongeza ubunifu wa kiufundi na mbinu za kisasa katika mchezo wa timu. Hata hivyo, utendaji ndani ya muda wake umefanyiwa tathmini na pande zote kukubaliana kutengana kwa masilahi mapana ya klabu.
Wakati mashabiki wakiendelea kutaka mafanikio na ushindani mkubwa, uongozi wa Simba umeahidi kutangaza kocha mpya mara tu mchakato utakapokamilika. Klabu imewataka wanachama na wapenzi kuendelea kuiunga mkono timu katika kipindi hiki cha mabadiliko.
Instagram
Facebook
YouTube
Hakuna maoni:
Chapisha Maoni