UCC YASITISHA INTANETI UGANDA WAKATI WA UCHAGUZI: MAWASILIANO YAZIMWA KUANZIA JANUARI 13

 Tume ya Mawasiliano ya Uganda (UCC) imeamuru kusitishwa kwa huduma za intaneti nchini humo katika kipindi cha uchaguzi mkuu unaotarajiwa kufanyika Alhamisi, Januari 15, 2026. Hatua hiyo imezua mjadala mpana ndani na nje ya nchi, hasa kuhusu haki za kidijitali na uhuru wa kupata taarifa.

Kwa mujibu wa taarifa iliyosambaa kwa kasi mitandaoni na kuthibitishwa na vyombo kadhaa vya habari vya ndani, UCC imesema utekelezaji wa agizo hilo umeanza kuanzia saa kumi na mbili jioni Jumanne, Januari 13, 2026. Tume imenukuu kuwa uamuzi huo umetokana na “pendekezo” la Kamati ya Usalama ya Mashirika ya Kimataifa.

Hadi sasa, watumiaji wengi wa huduma za data za simu za mkononi wameripoti kushindwa kufikia intaneti, huku baadhi ya maeneo ya biashara ikiwemo hoteli kubwa yakiendelea kupata huduma kwa kiwango fulani. Agizo hilo linawahusu pia watoa huduma za mawasiliano, waliotakiwa kuzima kwa muda ufikiaji wa majukwaa ya mitandao ya kijamii, huduma za data za simu na njia nyingine zote za mawasiliano zinazotegemea intaneti kwa kipindi chote cha upigaji kura na baada ya uchaguzi.

UCC imesema uamuzi huo umechukuliwa kwa kuzingatia mamlaka yake chini ya Sheria ya Mawasiliano ya Uganda, inayoruhusu udhibiti wa huduma za mawasiliano kwa maslahi ya usalama wa taifa na usalama wa umma. Hata hivyo, baadhi ya taasisi hazikujumuishwa kwenye agizo hilo; wafanyakazi walioidhinishwa wataruhusiwa kufikia intaneti kupitia njia salama zilizoidhinishwa, ikiwemo matumizi ya VPN maalum.

Tume imewashauri wananchi kufanya mipango mbadala ya mawasiliano wakati wa kuzimwa kwa intaneti, ikiahidi kuwa huduma zitarejeshwa mara itakapojiridhisha kuwa mchakato wa uchaguzi umekamilika kwa usalama.

Si mara ya kwanza kwa Uganda kudhibiti mawasiliano ya intaneti wakati wa uchaguzi. Serikali imekuwa ikitetea hatua hiyo kama njia ya kuzuia kuenea kwa taarifa potofu na machafuko yanayoweza kujitokeza, ingawa imekuwa ikikosolewa vikali na mashirika ya kiraia na watetezi wa haki za kidijitali.

Uchaguzi wa Januari 15 unatarajiwa kufuatiliwa kwa karibu, huku hali ya kisiasa na kiusalama ikiongezeka kote nchini. Rais Yoweri Museveni, aliyeiongoza Uganda kwa takribani miaka 40,