Michuano ya Kombe la Mataifa ya Afrika (AFCON) 2025 imeingia rasmi katika hatua ya mchujo, hatua inayokusanya ubora, presha na msisimko wa hali ya juu barani Afrika. Baada ya kuchezwa mechi 36 za hatua ya makundi katika makundi sita, jumla ya timu 16 kati ya 24 zimefanikiwa kufuzu na sasa zinajiandaa kupambana katika duru ya pili ya mechi nane zitakazochezwa kwa kipindi cha siku nne.
Leo Jumamosi, macho ya mashabiki yataelekezwa katika mechi kadhaa zenye mvuto mkubwa. Nyota Sadio Mané ataiongoza Senegal itakapovaana na Sudan, timu iliyofanikiwa kutinga hatua ya mchujo licha ya changamoto kubwa ikiwemo kukosa kufunga bao katika hatua ya makundi. Sudan pia inawakilisha taifa lililokumbwa na vita vya wenyewe kwa wenyewe tangu mwaka 2023, jambo linaloipa mechi hiyo uzito wa kihisia na kihistoria.
Kesho, Jumapili, ratiba itaendelea kwa mechi nyingine kali ambapo Mali itakutana na Tunisia katika pambano linalotarajiwa kuwa na ushindani mkubwa kutokana na ubora wa timu zote mbili.
Hata hivyo, macho na mioyo ya Watanzania itaelekezwa zaidi kwenye mechi ya Taifa Stars itakayochezwa Jumapili dhidi ya wenyeji Morocco. Morocco, ambayo ilishinda taji lake la mwisho la AFCON miaka 50 iliyopita, itakuwa nyumbani lakini haitakuwa na kazi rahisi mbele ya Tanzania yenye morali ya hali ya juu.
Taifa Stars tayari imeandika historia kwa kufuzu hatua ya mchujo ya AFCON kwa mara ya kwanza baada ya miaka 45, hatua inayodhihirisha ukuaji na mabadiliko chanya ya soka la Tanzania. Mechi dhidi ya Morocco si tu pambano la kusaka ushindi, bali ni fursa ya kuthibitisha kuwa Tanzania imefika hatua ya kushindana na wakubwa wa soka Afrika.
Mungu ibariki Tanzania. Taifa Stars mnapoingia dimbani, taifa zima lipo nyuma yenu. 🇹🇿⚽
Instagram
Facebook
Hakuna maoni:
Chapisha Maoni