“YOU’RE MY AMEN” — JE, DAYNA NYANGE ATANGAZA WIMBO AU SHEMEJI MPYA?

 Msanii Dayna Nyange amezua gumzo kubwa mitandaoni baada ya kuposti picha akiwa na mpenzi wake mzungu, akiambatanisha na ujumbe mzito wa mapenzi ulioacha wengi wakijiuliza: je, huu ni utangulizi wa wimbo mpya au ni utambulisho rasmi wa shemeji?

Kupitia ukurasa wake wa Instagram, Dayna aliandika maneno yaliyosheheni hisia, akieleza kuwa kwa muda mrefu alikuwa akisemwa kuwa ni mtu wa kuchagua sana katika mahusiano. Hata hivyo, alisisitiza kuwa anajua anachokitaka, na sasa amempata yule aliyekuwa akimuombea.

Kauli yake ya “YOU’RE MY AMEN” imevutia hisia za mashabiki wake wengi, huku wengine wakihisi huenda ni jina au beti ya wimbo mpya unaokuja, wakati wengine wakiamini kuwa huu ni uthibitisho wa mapenzi ya dhati na huenda shemeji ametambulishwa rasmi.

Katika ujumbe huo, Dayna ameandika kuwa anamchagua mpenzi wake leo, kesho na hata milele, akieleza furaha yake ya kushiriki maisha yake yote na mtu huyo ambaye amemtaja kama jibu la maombi yake.

Mpaka sasa, Dayna Nyange bado hajafafanua kama maneno hayo yanaashiria ujio wa kazi mpya ya muziki au ni mapenzi halisi yanayoelekea hatua kubwa zaidi. Hata hivyo, kilicho wazi ni kwamba ujumbe huo umefanikiwa kuwafanya wengi wabaki na swali moja kubwa: ni wimbo au ni shemeji kweli?

Endelea kufuatilia kwa taarifa zaidi. 🎶❤️