Matonya, mwenye umri wa miaka 43, alifikishwa katika mahakama ya Mombasa siku ya Alhamisi ambapo alisimama kidete na kukanusha shtaka la kumnyanyasa mwanamke. Kwa mujibu wa upande wa mashtaka, tukio hilo linadaiwa kutokea Aprili 7 katika eneo la Nyali, Kaunti ya Mombasa, kabla ya msanii huyo kukamatwa muda mfupi baadaye.
Drama ya mahakamani iliendelea pale waendesha mashtaka walipoomba masharti magumu ya dhamana wakihofia huenda msanii huyo akatoroka, wakidai hana makazi ya kudumu nchini humo. Hata hivyo, mahakama ilitoa dhamana ya shilingi 500,000 za Kenya (takribani dola 3,800), ikimtaka akabidhi pasi yake ya kusafiria na kumzuia kuondoka nchini bila ruhusa rasmi.
Wakati mamlaka za Tanzania zikiwa bado kimya kuhusu sakata hilo, mitandao ya kijamii imewaka moto—baadhi ya mashabiki wakimtetea Matonya huku wengine wakikosoa vikali madai yanayomkabili.
Matonya, anayekumbukwa kwa vibao vilivyotikisa Afrika Mashariki kama Vaileti, Anita, Taxi Bubu na Mapito, aliwahi kuwa sauti ya mapenzi na simulizi za maisha ya kila siku. Sasa, jina lake limegeuka kuwa gumzo jipya—lakini safari hii si kwa muziki, bali kwa sakata la kisheria.
Hii si mara ya kwanza kwa wasanii wa Tanzania kukumbana na misukosuko nchini Kenya. Mwaka 2022, Rajab Abdul Kahali maarufu kama Harmonize aliwahi kukamatwa mjini Nairobi kwa madai ya kuvunja mkataba wa maonyesho—jambo lililokuja kumalizwa baadaye.
Je, Matonya ataweza kusafisha jina lake au hii itakuwa sura mpya yenye doa katika historia yake ya muziki? Wengi wanasubiri kwa hamu kuona hatima ya kesi hii.
Instagram
Facebook
Hakuna maoni:
Chapisha Maoni