Hatua hiyo imetangazwa na Waziri wa Fedha wa Marekani, Scott Bessent, ambaye amesema leseni maalum ya muda imetolewa ili kuruhusu baadhi ya nchi kuendelea kununua mafuta kutoka Urusi katika kipindi hiki cha mpito.
Kupitia ujumbe aliouchapisha kwenye mtandao wa X, Bessent alisema kuwa uamuzi huo unalenga kusaidia mataifa yaliyo kwenye mazingira magumu kupata mafuta kwa wakati huku ukisaidia kuimarisha bei ya mafuta ghafi katika soko la kimataifa.
Kwa mujibu wa taarifa hiyo, Marekani inaamini kuwa kuongeza muda wa msamaha huo kutazuia athari kubwa za kiuchumi ambazo zinaweza kujitokeza endapo baadhi ya mataifa yatakosa upatikanaji wa mafuta muhimu kwa shughuli za uzalishaji na usafirishaji.
Awali, Waziri huyo alikuwa amesema hakukuwa na mpango wa kuongeza tena msamaha wa vikwazo hivyo, jambo lililozua mjadala mkubwa katika masoko ya nishati duniani. Hata hivyo, mabadiliko ya hali ya soko pamoja na mahitaji ya baadhi ya mataifa yameifanya Marekani kuchukua hatua mpya ya kuongeza muda wa leseni hiyo.
Wachambuzi wa masuala ya uchumi wanaeleza kuwa uamuzi huo unaweza kusaidia kupunguza msukosuko wa bei za mafuta duniani, hasa katika kipindi ambacho mataifa mengi bado yanapambana na changamoto za kiuchumi na gharama kubwa za nishati.
Hii ni mara ya pili kwa Wizara ya Fedha ya Marekani kutoa msamaha wa muda dhidi ya vikwazo vinavyohusiana na mafuta ya Urusi tangu kuanza kwa hatua kali za kiuchumi dhidi ya Moscow.
Uamuzi huo unaendelea kufuatiliwa kwa karibu na wadau wa sekta ya nishati duniani, huku ukiibua mjadala kuhusu usawa kati ya vikwazo vya kiuchumi na mahitaji ya msingi ya nishati kwa mataifa mbalimbali.
Instagram
Facebook
Hakuna maoni:
Chapisha Maoni