Meneja wa Habari na Mawasiliano wa Klabu ya Yanga, Ally Kamwe, ametoa kauli kuhusu uongozi wa Rais wa klabu hiyo, Eng. Hersi Said, akisema umeacha alama kubwa katika historia ya Yanga, hasa katika ushindani dhidi ya Simba SC.
Kupitia ujumbe wake, Kamwe amesema moja ya mafanikio makubwa anayoyaona katika kipindi cha miaka mitano ya uongozi wa Eng. Hersi ni namna Yanga imeendelea kuonyesha ushindani mkubwa dhidi ya Simba katika mechi za watani wa jadi.
Kamwe amedai kuwa katika kipindi hicho, Simba imepitia mabadiliko mbalimbali ya kiuongozi, ikiwemo kubadilika kwa viongozi wa Bodi na Wakurugenzi wa Klabu hiyo.
“Legacy kubwa ambayo Eng. Hersi ameitengeneza kwenye historia yake ya uongozi ndani ya Klabu ya Yanga ni kuifanya Simba SC kuwa timu ya kawaida mbele ya Yanga katika kipindi cha miaka mitano mfululizo,” aliandika Kamwe.
Aidha, Kamwe amedai kuwa pamoja na mabadiliko mbalimbali ndani ya Simba SC, Yanga imeendelea kusimama imara chini ya uongozi wa Eng. Hersi.
Akizungumzia mchezo wa Ngao ya Jamii uliochezwa Zanzibar, Kamwe pia alitoa kauli ya utani kuelekea Simba, huku akisisitiza kuwa Yanga iko tayari kuendelea na ushindani.
Kauli hiyo imekuja katika kipindi ambacho ushindani kati ya Yanga na Simba umeendelea kuwa miongoni mwa mijadala mikubwa katika soka la Tanzania, huku mashabiki wa pande zote mbili wakifuatilia kwa karibu matokeo na mwenendo wa timu zao.
Kamwe amehitimisha ujumbe wake kwa kuwahamasisha Simba kuleta timu ili kuendelea na ushindani katika mechi zijazo, akitumia lugha ya kiutani inayotumika mara kwa mara katika mijadala ya soka kati ya mashabiki wa Yanga na Simba.
Instagram
Facebook
Hakuna maoni:
Chapisha Maoni