LIONEL MESSI ATANGAZA KUSTAAFU TIMU YA TAIFA YA ARGENTINA

Lionel Messi ametangaza kustaafu kuichezea timu ya taifa ya Argentina, akifunga ukurasa wa safari yake ya kimataifa iliyodumu kwa takribani miaka 20.

Ujumbe wa Messi kuhusu uamuzi huo umeendelea kusambaa mitandaoni baada ya kushirikiwa pia na mwandishi wa habari za michezo Fabrizio Romano.

Katika ujumbe huo, Messi amesema uamuzi wa kuachana na timu ya taifa haukuwa rahisi kwake, lakini baada ya kutafakari kwa kina anaamini umefika wakati sahihi wa kuhitimisha safari hiyo.

Messi ameeleza kuwa katika kipindi chote alichoitumikia Argentina, alijitahidi kutoa kila alichokuwa nacho kwa ajili ya jezi ya taifa, huku akilenga kuwapa mashabiki furaha na kuwafanya wajivunie nchi yao kupitia soka.

MESSI ATOA SHUKRANI KWA MASHABIKI

Nyota huyo amewashukuru mashabiki wa Argentina kwa upendo na sapoti waliompa katika kipindi chote cha miaka yake akiwa na timu ya taifa.

Pia ametoa shukrani kwa familia yake, makocha, wachezaji wenzake pamoja na viongozi aliowahi kufanya nao kazi katika safari yake ya kimataifa.

Messi amesema anaondoka akiwa na amani na fahari, akitambua kuwa yeye pamoja na wachezaji wenzake waliwahi kuwapa Waargentina nyakati ambazo hapo awali walikuwa wakiziota.

Aidha, amesema kizazi kipya cha wachezaji kinaendelea kuibuka na kwamba kuna vijana wenye uwezo wanaostahili kuendelea kupewa nafasi ndani ya timu ya taifa.

ATAENDELEA KUIUNGA MKONO ARGENTINA

Licha ya kutangaza kuachana na timu ya taifa, Messi amesema ataendelea kuiunga mkono Argentina akiwa nje ya uwanja.

Amesisitiza kuwa ataendelea kuwa shabiki wa timu hiyo katika nyakati nzuri na hata zaidi wakati ambao mambo hayatakwenda vizuri.

Messi amemshukuru Mungu kwa kumfanya kuwa Mwargentina na kumalizia ujumbe wake kwa kauli, “Vamos Argentina!”

MWISHO WA SAFARI YA MIAKA 20

Uamuzi huu unaashiria mwisho wa moja ya safari kubwa zaidi katika historia ya soka la kimataifa.

Messi ameacha alama kubwa akiwa na Argentina, ikiwa ni pamoja na kuiongoza timu hiyo kutwaa Kombe la Dunia 2022 pamoja na mataji mengine ya kimataifa.

Kwa upande wa takwimu, Messi amekuwa miongoni mwa wachezaji muhimu zaidi katika historia ya Argentina, akiwa mfungaji bora na mmoja wa wachezaji waliotumikia taifa hilo kwa muda mrefu zaidi.

Kwa sasa, macho ya mashabiki wa soka yanaelekezwa katika hatua inayofuata ya maisha ya Messi baada ya kutangaza rasmi kuhitimisha safari yake akiwa na jezi ya Argentina.