TANZANIA YAJIPANGA KUNUFAIKA ZAIDI NA TEKNOLOJIA YA DRONI

Tanzania inaongeza juhudi za kunufaika na teknolojia ya droni kwa kuimarisha uratibu, udhibiti na uwezo wa kitaalamu.

Akizungumza wakati wa uzinduzi wa Timu ya Kitaifa ya Droni uliofanyika Dar es Salaam, Mkurugenzi Mkuu wa Mamlaka ya Usafiri wa Anga Tanzania (TCAA), Dkt. Jabiri Bakari, alisema Tanzania inapaswa kwenda zaidi ya kuwa mtumiaji wa teknolojia ya droni kwa kujenga uwezo wa kitaifa wa kuielewa, kuiendeleza na kuisimamia kupitia mifumo madhubuti ya udhibiti.

Dkt. Bakari alisisitiza umuhimu wa kuwa na mifumo imara ya usajili, utoaji wa vibali na mahitaji mengine ya uendeshaji wa droni, sambamba na kuweka mazingira yanayochochea ubunifu, uwekezaji na maendeleo ya teknolojia hiyo nchini.

Kutokana na fursa hizo, Dkt. Bakari alitoa wito wa kuimarishwa kwa ushirikiano kati ya taasisi za Serikali, mamlaka za udhibiti, sekta binafsi, wabunifu, wataalamu na wadau wengine ili kuhakikisha Tanzania inanufaika kikamilifu na teknolojia hiyo bila kuathiri masuala ya usalama na ulinzi.

Aidha, alisema kasi ya maendeleo ya teknolojia, ikiwemo akili mnemba na droni zinazoweza kutekeleza majukumu mbalimbali kwa kiwango kikubwa bila uingiliaji mkubwa wa binadamu, inahitaji Tanzania kuendelea kuimarisha sera, ujuzi wa wataalamu na uwezo wa taasisi zake.

Timu ya Kitaifa ya Droni inatarajiwa kuimarisha uratibu wa pamoja nchini na kuwezesha wadau kuunganisha ubunifu na fursa za kiuchumi na mahitaji ya usalama, udhibiti na matumizi yanayowajibika ya teknolojia hiyo, wakati Tanzania ikiendelea kujiandaa na ongezeko la matumizi ya droni kuelekea mwaka 2030 na kuendelea.

Hatua hiyo inaendana na juhudi zinazoendelea za TCAA katika kuimarisha usimamizi wa shughuli za droni nchini, ikiwemo taratibu za usajili, vibali na utungaji kanuni za uendeshaji.