UJUMBE WA UWEKEZAJI TANZANIA–EU | HELSINKI, FINLAND 🇹🇿🇪🇺

Kaimu Mkurugenzi Mtendaji wa Tanzania Private Sector Federation (TPSF), Deogratius Aloyce Massawe, amesisitiza dhamira ya sekta binafsi ya Tanzania katika kuwaunga mkono wawekezaji na kuimarisha ushirikiano wa kibiashara kati ya Tanzania na masoko ya Ulaya

Akizungumza jijini Helsinki, Finland, wakati wa mkutano wa maandalizi kuelekea EU–Tanzania Investment and Business Forum 2027, Kaimu Mkurugenzi Mtendaji aliwaalika wawekezaji kutoka Finland na maeneo mbalimbali ya Ulaya kuchangamkia fursa zinazoongezeka nchini Tanzania. Alisisitiza kuwa sekta binafsi iko tayari kushirikiana na wawekezaji, kuwaunganisha na wadau sahihi na kuwezesha mahusiano na jumuiya ya wafanyabiashara nchini

Alieleza kuwa sekta binafsi ina nafasi muhimu katika kujenga imani kwa mazingira ya uwekezaji nchini Tanzania, hususan kupitia mazungumzo ya kisera, utetezi wa mazingira ya biashara yanayotabirika na yenye ushindani, pamoja na kuwaunganisha wawekezaji na washirika halali na wenye uwezo katika sekta binafsi ya Tanzania

Aidha, alibainisha fursa za uwekezaji katika maeneo mbalimbali ikiwemo kilimo na uchakataji wa mazao, viwanda, madini na uongezaji thamani, pamoja na uchumi wa kidijitali, huku akisisitiza umuhimu wa kuendelea kushughulikia masuala ya kisera na kikanuni yanayoweza kuongeza imani ya wawekezaji na kuwezesha uwekezaji wa muda mrefu.

“Sekta binafsi ya Tanzania iko tayari kuwakaribisha wawekezaji, kujenga ubia na kushirikiana na Serikali katika kushughulikia masuala ya sera na mazingira ya biashara yanayowahusu wawekezaji. Jukumu letu ni kuhakikisha kuwa nia ya kuwekeza inageuka kuwa fursa halisi na endelevu za biashara.”Deogratius Massawe, Kaimu Mkurugenzi Mtendaji, TPSF

Ushiriki huu ni sehemu ya juhudi pana za Tanzania za kuimarisha uhusiano wa kibiashara na uwekezaji kati ya Tanzania na Ulaya, kuelekea EU–Tanzania Investment and Business Forum 2027

Tanzania iko tayari kwa biashara. Sekta binafsi iko tayari kushirikiana. 🇹🇿🤝🇪🇺