Airtel Africa imeandika historia mpya ya mafanikio baada ya kutangaza faida baada ya kodi ya Dola za Marekani milioni 586 kwa kipindi cha miezi tisa kilichoishia Desemba 31, 2025. Mafanikio haya yanaonyesha ongezeko la zaidi ya mara mbili ikilinganishwa na faida ya Dola milioni 248 iliyopatikana katika kipindi kama hicho mwaka uliotangulia.
Ukuaji huu mkubwa umechangiwa kwa kiasi kikubwa na kuimarika kwa faida za uendeshaji, ongezeko la mapato ya kifedha pamoja na mabadiliko chanya ya thamani ya fedha za kigeni, hali iliyochochea kwa nguvu utendaji wa kifedha wa kampuni hiyo barani Afrika.
Katika kipindi hicho, faida ya uendeshaji pamoja na athari za mabadiliko ya fedha za kigeni zilifikia Dola milioni 99, ikilinganishwa na hasara ya Dola milioni 153 katika kipindi kilichopita. Mabadiliko haya yanaashiria uthabiti na ufanisi wa mkakati wa kifedha unaotekelezwa na Airtel Africa.
Kwa upande wa mapato, kampuni ilirekodi mapato ya jumla ya Dola milioni 4,667 ndani ya miezi tisa, sawa na ongezeko la asilimia 24.6 kwa sarafu thabiti na asilimia 28.3 kwa mapato yaliyoripotiwa, jambo lililotokana na kuimarika kwa sarafu katika masoko mbalimbali.
Utekelezaji madhubuti wa mkakati wa biashara uliendelea kuzaa matunda zaidi katika Robo ya Tatu ya mwaka 2026, ambapo mapato yaliongezeka kwa asilimia 24.7 kwa sarafu thabiti na kufikia asilimia 32.9 kwa mapato yaliyoripotiwa, yakichochewa zaidi na mazingira mazuri ya sarafu.
Kwa mujibu wa taarifa hiyo, mapato ya huduma za simu yaliongezeka kwa asilimia 23.3. Huduma za data, ambazo ndizo mhimili mkuu wa mapato ya Airtel Africa, zilipanda kwa asilimia 36.5 huku mapato ya huduma za sauti yakiongezeka kwa asilimia 13.5, ishara ya kuongezeka kwa matumizi ya huduma za kidijitali miongoni mwa wateja.
Huduma za Mobile Money nazo ziliendelea kuonyesha ukuaji wa kuvutia, zikirekodi ongezeko la asilimia 29.4 kwa sarafu thabiti. Airtel Money iliendelea kuvuka hatua muhimu za maendeleo katika muhula huu, ikithibitisha mchango wake mkubwa katika ukuaji wa mapato ya kampuni.
Idadi ya wateja wa Airtel Money iliongezeka kwa asilimia 17.3 na kufikia wateja milioni 52, huku thamani ya jumla ya miamala iliyosindikwa kwa mwaka (TPV) katika Robo ya Tatu ya 2026 ikizidi Dola bilioni 210, sawa na ongezeko la asilimia 36.
Ukuaji wa mfumo mpana wa huduma pamoja na kuongezeka kwa matumizi ya kidijitali kumepelekea pia kuongezeka kwa wastani wa mapato kwa kila mteja (ARPU) kwa asilimia 9.8 kwa sarafu thabiti.
Kutambua fursa kubwa zilizopo katika masoko yake, Airtel Africa iliendelea kuwekeza kwa kuzingatia miongozo ya matumizi ya mtaji (capex) iliyorekebishwa. Matumizi ya mtaji yalifikia Dola milioni 603, ongezeko la asilimia 32.2 ikilinganishwa na kipindi kilichopita.
Uwekezaji huo uliwezesha ujenzi wa takriban minara mipya 2,500 ya mawasiliano pamoja na upanuzi wa mtandao wa nyuzi za kioo kwa takriban kilomita 4,000, na hivyo kufikisha jumla ya mtandao huo hadi kilomita 81,500. Hatua hii imeimarisha uwezo wa mtandao na kuboresha kwa kiasi kikubwa uzoefu wa wateja.
Kwa ujumla, ufikiaji wa huduma za Airtel Africa kwa wananchi ulifikia asilimia 81.7, ikiwa ni ongezeko la alama 0.6 ikilinganishwa na mwaka uliopita.
Akizungumza kuhusu matokeo hayo, Mkurugenzi Mtendaji wa Airtel Africa, Sunil Taldar, alisema matokeo hayo yanaonyesha uimara wa mkakati wa kampuni, akibainisha kuwa yanaakisi utendaji thabiti wa kifedha na uendeshaji katika biashara zote za Airtel Africa barani Afrika.
Instagram
Facebook
Hakuna maoni:
Chapisha Maoni