Hali ya huzuni imetanda nchini Haiti baada ya watu wasiopungua 30 kuhofiwa kufariki dunia kufuatia mkanyagano uliotokea katika eneo maarufu la utalii la Citadel ya Laferrière siku ya Jumamosi. Tukio hilo lilijiri wakati wa mkusanyiko mkubwa wa maadhimisho ya Pasaka uliovutia mamia ya wageni na waumini, wengi wao wakiwa vijana. Eneo hilo, ambalo pia ni urithi wa dunia unaotambuliwa na UNESCO, lilikuwa limejaa kupita kiasi kufuatia hafla ya uzinduzi wa ngome hiyo ya kihistoria ya karne ya 19.
Kwa mujibu wa Jean Henri Petit, mkuu wa ulinzi wa kiraia katika idara ya Nord, idadi ya waliopoteza maisha inaweza kuongezeka kutokana na majeruhi walioko katika hali mbaya. Inaripotiwa kuwa mkanyagano huo ulianzia karibu na lango kuu la kuingilia eneo hilo, ambapo msongamano mkubwa ulisababisha taharuki miongoni mwa watu. Hali hiyo ilizidi kuwa mbaya zaidi baada ya mvua kubwa kuanza kunyesha ghafla, hali iliyowafanya watu kukimbilia hifadhi kwa wakati mmoja na kusababisha vurugu na msukosuko mkubwa.
Waziri Mkuu wa Haiti, Alix Didier Fils-Aimé, ameeleza masikitiko yake makubwa kufuatia tukio hilo na kutangaza kuanza kwa uchunguzi rasmi. Amesema serikali imehamasisha mamlaka zote husika kutoa msaada wa haraka kwa waathirika na familia zilizoathiriwa. “Tunatoa pole za dhati kwa familia zote zilizopoteza wapendwa wao katika tukio hili la kusikitisha,” alisema katika taarifa rasmi, huku akiahidi hatua kali zitachukuliwa ili kuzuia majanga kama haya kutokea tena siku zijazo.
Instagram
Facebook
Hakuna maoni:
Chapisha Maoni