Mamlaka ya Hali ya Hewa Tanzania (TMA) imetoa utabiri wa hali ya hewa kwa saa 24 zijazo kuanzia saa 3:00 usiku wa leo, ikieleza kuwa maeneo mbalimbali nchini yanatarajiwa kuwa na hali tofauti za anga, ikiwemo mawingu, vipindi vya jua pamoja na uwezekano wa mvua katika baadhi ya maeneo.
Kwa mujibu wa utabiri huo, mikoa ya Kagera, Mwanza, Geita, Shinyanga, Simiyu na Mara inatarajiwa kuwa na mawingu katika baadhi ya maeneo, huku kukiwa na uwezekano wa mvua zinazoambatana na ngurumo za radi katika maeneo machache.
Kwa upande wa Visiwa vya Unguja na Pemba, pamoja na mikoa ya Dodoma, Singida, Tanga, Dar es Salaam, Kigoma, Tabora, Katavi, Morogoro, Lindi, Mtwara, Arusha, Manyara, Kilimanjaro na Pwani ikijumuisha Visiwa vya Mafia, TMA imewataka wananchi kufuatilia taarifa rasmi za hali ya hewa kutokana na mabadiliko yanayoweza kujitokeza katika kipindi hicho.
Aidha, kwa mikoa ya Ruvuma, Mbeya, Rukwa, Iringa, Njombe na Songwe, hali ya hewa inatarajiwa kuwa na mawingu kiasi yanayochanganyika na vipindi vya jua katika maeneo mengi.
TMA imeendelea kusisitiza umuhimu wa wananchi kufuatilia utabiri wa hali ya hewa unaotolewa mara kwa mara ili kupanga shughuli zao za kila siku kwa kuzingatia mabadiliko ya hali ya anga, hususan kwa wakulima, wavuvi, wasafiri na wadau wengine wanaotegemea taarifa za hali ya hewa.
Wananchi wanashauriwa kuendelea kufuatilia taarifa na tahadhari zinazotolewa na Mamlaka ya Hali ya Hewa Tanzania kupitia njia zake rasmi kwa ajili ya kupata taarifa sahihi na za wakati kuhusu mwenendo wa hali ya hewa nchini.
Instagram
Facebook
Hakuna maoni:
Chapisha Maoni