Donald Trump ameonekana kwenye sarafu ya Marekani kwa mara ya kwanza akiwa rais aliye hai katika kipindi cha takriban karne moja, hatua inayokuja wakati Marekani ikijiandaa kusherehekea miaka 250 tangu kuanzishwa kwake.
Mint ya Marekani Jumatano ilizindua sarafu maalum ya ukumbusho yenye thamani ya dola moja ($1), ikiwa na picha ya Trump pamoja na kauli mbiu ya taifa la Marekani, “In God We Trust.” Sarafu hiyo imetengenezwa mahsusi kwa ajili ya kuadhimisha miaka 250 ya taifa hilo.
Kwa mujibu wa Mint ya Marekani, sarafu hiyo inalenga kuakisi “roho, fahari na urithi” wa Marekani kuelekea maadhimisho hayo makubwa. Muundo huo umeelezwa kuwa wa kipekee na umekusudiwa kuwa sehemu ya kumbukumbu za sarafu za kisasa za Marekani.
Sarafu hizo ziliuzwa kwa dola 61 kwa roll yenye sarafu 25, huku mfuko wa sarafu 100 ukiuzwa kwa dola 154.50. Hata hivyo, ndani ya saa chache baada ya kuanza kuuzwa, bidhaa hizo zilionekana kutopatikana kwenye tovuti ya Mint ya Marekani. Pia ziliendelea kuuzwa kupitia mashine maalum katika duka la Mint ya Marekani mjini Washington, D.C.
Licha ya kuwa na mwonekano wa rangi ya dhahabu, sarafu hizo hazijatengenezwa kwa dhahabu halisi. Kwa mujibu wa Mint ya Marekani, zinaundwa kwa asilimia 88.5 ya shaba, huku sehemu iliyobaki ikiwa ni mchanganyiko wa zinki, manganese na nikeli.
BBC imesema imewasiliana na Mint ya Marekani, Wizara ya Hazina na Ikulu ya Marekani ili kupata ufafanuzi zaidi kuhusu sarafu hiyo na hatua iliyochukuliwa kumweka rais aliye hai kwenye sarafu ya ukumbusho.
Instagram
Facebook
Hakuna maoni:
Chapisha Maoni