MAREKANI YAONDOA NDEGE ZA KIVITA B-1B LANCER NCHINI UINGEREZA BAADA YA TISHIO LA USALAMA

Marekani imeondoa ndege zake za kivita aina ya B-1B Lancer kutoka kituo cha kijeshi cha RAF Fairford nchini Uingereza, hatua iliyochukuliwa kutokana na sababu za kiusalama baada ya kukamatwa kwa watu kadhaa wanaotuhumiwa kuhusika na mipango ya mashambulizi ya kigaidi dhidi ya kituo hicho.

Kwa mujibu wa Pentagon, takribani ndege 12 za B-1B Lancer zilikuwa zimewekwa katika kituo hicho kilichopo nchini Uingereza. Ndege hizo sasa zimeondolewa na kurejeshwa katika vituo vyao vya kijeshi nchini Marekani.

Pentagon imethibitisha kuwa ndege zote za Marekani zilizokuwa zimetumwa RAF Fairford zimeondoka na kurejea katika vituo vyao vya nyumbani nchini Marekani.

Msemaji wa Pentagon amesema uamuzi huo haukutangazwa mapema kutokana na sababu za kiusalama zinazohusiana na operesheni hiyo.

UKAMATWAJI WA WATUHUMIWA WA UGAIDI

Hatua ya Marekani kuondoa ndege hizo imekuja takribani wiki moja baada ya polisi nchini Uingereza kuwakamata wanaume kadhaa kwa tuhuma za kuandaa vitendo vya kigaidi.

Serikali ya Uingereza pia imesema imepata viashiria vinavyoonyesha kuwa Iran huenda ilihusika katika njama hiyo. Hata hivyo, serikali ya Iran imekanusha madai hayo na kuyataja kuwa hayana msingi.

NDEGE ZA B-1B ZILIKUWA ZIKITUMIKA KATIKA OPERESHENI ZA KIJESHI

Ndege aina ya B-1B Lancer zilizokuwa RAF Fairford zilikuwa zikitumika katika operesheni za kijeshi za Marekani dhidi ya Iran.

Miongoni mwa operesheni hizo ni mashambulizi yaliyolenga maeneo ya makombora ya Iran yaliyokuwa yakishambulia meli katika eneo la Mlango wa Hormuz.

Kuondolewa kwa ndege hizo kutoka RAF Fairford kunaonyesha umuhimu wa hatua za kiusalama katika vituo vya kijeshi, hasa wakati ambapo mamlaka zinachunguza vitisho vinavyoweza kuhatarisha wanajeshi, vifaa na miundombinu ya kijeshi.

Kwa sasa, Pentagon imesema ndege hizo zote zimerudi Marekani, huku hatua zaidi za kiusalama zikitarajiwa kuendelea kulingana na tathmini ya mamlaka husika.